Psa 10 | THOT | STEP | לָ מָ֣ה יְ֭הוָה תַּעֲמֹ֣ד בְּ רָח֑וֹק תַּ֝עְלִ֗ים לְ עִתּ֥וֹת בַּצָּרָֽה ׃

Psalms 10

1 לָמָה יְהוָה תַּעֲמֹד בְּרָחוֹק תַּעְלִים לְעִתּוֹת בַּצָּרָֽה׃ 2 בְּגַאֲוַת רָשָׁע יִדְלַק עָנִי יִתָּפְשׂוּ׀ בִּמְזִמּוֹת זוּ חָשָֽׁבוּ׃ 3 כִּֽי־הִלֵּל רָשָׁע עַל־תַּאֲוַת נַפְשׁוֹ וּבֹצֵעַ בֵּרֵךְ נִאֵץ׀ יְהוָֽה׃ 4 רָשָׁע כְּגֹבַהּ אַפּוֹ בַּל־יִדְרֹשׁ אֵין אֱלֹהִים כָּל־מְזִמּוֹתָֽיו׃ 5 יָחִילוּ דַרְכּוֹ ^{▼▼For Ketiv דַרְכּוֹ Qere= דְרָכָיו} בְּכָל־עֵת מָרוֹם מִשְׁפָּטֶיךָ מִנֶּגְדּוֹ כָּל־צוֹרְרָיו יָפִיחַ בָּהֶֽם׃ 6 אָמַר בְּלִבּוֹ בַּל־אֶמּוֹט לְדֹר וָדֹר אֲשֶׁר לֹֽא־בְרָֽע׃ 7 אָלָה פִּיהוּ מָלֵא וּמִרְמוֹת וָתֹךְ תַּחַת לְשׁוֹנוֹ עָמָל וָאָֽוֶן׃ 8 יֵשֵׁב׀ בְּמַאְרַב חֲצֵרִים בַּֽמִּסְתָּרִים יַהֲרֹג נָקִי עֵינָיו לְֽחֵלְכָה יִצְפֹּֽנוּ׃ 9 יֶאֱרֹב בַּמִּסְתָּר׀ כְּאַרְיֵה בְסֻכֹּה יֶאֱרֹב לַחֲטוֹף עָנִי יַחְטֹף עָנִי בְּמָשְׁכוֹ בְרִשְׁתּֽוֹ׃ 10 וְדָכָה ^{▼▼For Ketiv וְדָכָה Qere= יִדְכֶּה} יָשֹׁחַ וְנָפַל בַּעֲצוּמָיו חֶלְכָּאִים׃ ^{▼▼For Ketiv חֶלְכָּאִים׃ Qere= חֵיל כָּאִֽים׃} 11 אָמַר בְּלִבּוֹ שָׁכַֽח אֵל הִסְתִּיר פָּנָיו בַּל־רָאָה לָנֶֽצַח׃ 12 קוּמָה יְהוָה אֵל נְשָׂא יָדֶךָ אַל־תִּשְׁכַּח עֲנִיִּים׃ ^{▼▼For Ketiv עֲנִיִּים׃ Qere= עֲנָוִֽים׃} 13 עַל־מֶה׀ נִאֵץ רָשָׁע׀ אֱלֹהִים אָמַר בְּלִבּוֹ לֹא תִּדְרֹֽשׁ׃ 14 רָאִתָה כִּֽי־אַתָּה׀ עָמָל וָכַעַס׀ תַּבִּיט לָתֵת בְּיָדֶךָ עָלֶיךָ יַעֲזֹב חֵלֶכָה יָתוֹם אַתָּה׀ הָיִיתָ עוֹזֵֽר׃ 15 שְׁבֹר זְרוֹעַ רָשָׁע וָרָע תִּֽדְרוֹשׁ־רִשְׁעוֹ בַל־תִּמְצָֽא׃ 16 יְהוָה מֶלֶךְ עוֹלָם וָעֶד אָבְדוּ גוֹיִם מֵֽאַרְצֽוֹ׃ 17 תַּאֲוַת עֲנָוִים שָׁמַעְתָּ יְהוָה תָּכִין לִבָּם תַּקְשִׁיב אָזְנֶֽךָ׃ 18 לִשְׁפֹּט יָתוֹם וָדָךְ בַּל־יוֹסִיף עוֹד לַעֲרֹץ אֱנוֹשׁ מִן־הָאָֽרֶץ׃